Jahon oltin kengashi (WGC) hisobotiga koʻra, Oʻzbekiston Markaziy banki sentyabr oyida 7 tonna oltin xarid qilgan va bu natija bilan jahon markaziy banklari orasida uchinchi oʻrinni egallagan. Bu koʻrsatkich 2026 yil boshidan buyon qayd etilgan eng yuqori oylik xarid miqdori hisoblanadi.
Sentyabrda dunyo markaziy banklarining sof oltin xaridi jami 61 tonnani tashkil etgan. Oltinning eng katta xaridchilari Polsha (25 tonna) va Xitoy (23 tonna) boʻlgan. Xitoy Markaziy banki oʻz zaxiralarini ketma-ket 23 oydan beri oshirib kelmoqda.
Oʻzbekistondan keyingi yirik xaridchilar qatorida Qozogʻiston 5 tonna, Iordaniya 4 tonna, Chexiya 2 tonna va Boliviya 1 tonna oltin xarid qilgan. Boshqa tomondan, eng katta sotuvchi Rossiya Markaziy banki boʻlib, u sentyabrda oʻz zaxiralarini 6 tonnaga qisqartirgan.
2026 yilning yanvardan sentyabrgacha boʻlgan davrida ham Polsha (123 tonna) va Xitoy (103 tonna) eng koʻp oltin xarid qilgan davlatlar boʻlib, Oʻzbekiston ham yil boshidan buyon amalga oshirilgan sof xaridlar boʻyicha uchinchi oʻrinni egallamoqda.
Shu davrda Qozogʻiston, Chexiya, Singapur va Chili ham oʻz oltin zaxiralarini 10 tonnadan ortiq oshirgan. Yil boshidan buyon eng koʻp oltin sotgan davlat Turkiya boʻlib, uning zaxiralari 82 tonnaga kamaygan. Rossiya esa toʻqqiz oy davomida 62 tonna oltin sotilgan.
Umumiy hisobda, dunyo markaziy banklari yil boshidan buyon 228 tonna oltinni sof xarid qilgan, bu koʻrsatkich oʻtgan yilning mos davriga nisbatan 7 foiz kam boʻlgan.
