Ijtimoiy tarmoqlar nafaqat muloqot va trendlarning usullarini, balki odamlarning oʻzini anglash va oʻzini ifodalashga yondashuvini ham oʻzgartirdi. Bugun odamlar hayotining maʼlum jihatlariga, kayfiyatiga yoki turmush tarziga maxsus nomlar berishni boshladilar.
Z avlodining raqamli tilida «davr» atamasi bu tendensiyaning bir qismi hisoblanadi. Kimdir «yumshoq qiz davri» (soft girl era) da, kimdir «shifo davri» (healing era) da, «fitnes davri» (fitness era) da yoki «oʻzini sevish davri» (self-love era) da boʻladi. Shu tariqa, har qanday yangi hayot bosqichi yangi «davr» boʻlishi mumkin.
«Davr» nimani anglatadi?
Oddiy qilib aytganda, «davr» inson hayotidagi maʼlum bir davr yoki bosqichni belgilash uchun ishlatiladi. Hozirgi paytda hayotingizda eng muhim boʻlgan narsani oʻzingizning «davringiz» deb atashingiz mumkin. Masalan, agar odam sogʻligʻiga va jismoniy shakliga eʼtibor qaratayotgan boʻlsa, u oʻzini hazil maʼnosida yoki befarq ravishda «fitnes davridagi» odam deb atashi mumkin. Shunga oʻxshab, ajralishdan soʻng oʻziga eʼtibor qaratadigan odam hayotini «shifo davri» deb atashi mumkin.
Nima uchun «yumshoq qiz davri» mashhur boʻldi?
«Yumshoq qiz davri» bu hodisaning yorqin misolidir. Bu shunchaki kiyim yoki makiyaj bilan bogʻliq trend emas. U yumshoqlik, oʻziga gʻamxoʻrlik, qulaylik va oʻz baxtini ustuvor qoʻyish kabi elementlarni oʻz ichiga oladi. 2025 yilda nashr etilgan akademik maqolada «yumshoq qiz davri» komfor, shifo va quvonchga urgʻu beruvchi hayot tarzi trendi sifatida koʻrib chiqilgan.
Ijtimoiy tarmoqlarda pastel ranglar, yumshoq makiyaj, kundalik yuritish, oʻziga gʻamxoʻrlik va tinch hayot tarzi kabi vizual obraz shakllandi. Garchi «yumshoq qiz» tendenziyasi faqat shu koʻrinishda boshlangan boʻlmasa ham, vaqt oʻtishi bilan uning maʼnosi modadan hayot tarziga va shaxsiy tanlovga kengaydi.
Har bir bosqichni nomlashga nima uchun ehtiyoj bor?
Z avlodi uchun «davr» shunchaki moda soʻzi emas, balki oʻzini ifodalash usulidir. U uzoq muddatli davrni yoki kayfiyatni bitta qisqa soʻz bilan tasvirlash imkonini beradi. «Men hozir shifo davrimdaman» kabi ibora butun hikoyani aytishdan koʻra ijtimoiy tarmoqlar uchun oddiyroq va mosroq tuyuladi. 2024 yilda Meta va Instagram trend-sayrida taqdim etilgan hisobotga koʻra, hindistonlik Z avlodining shaxsiy oʻsish va oʻzini takomillashtirishga qiziqishi sezilgan. Xususan, hindistonlik Z avlodining 43% i «oʻzini takomillashtirish davrini» yaratish umidini bildirdi.
Shunday qilib, «davr» shunchaki internet trendidan tashqariga chiqdi. U ijtimoiy tarmoqlarda hayotning turli bosqichlarini nomlash, tanib olish va ifodalash usuliga aylandi. Baʼzan bu moda va hayot tarzi bilan bogʻliq boʻlsa, baʼzan esa shaxsiy oʻsish va oʻziga gʻamxoʻrlik bilan bogʻliq boʻladi. Biroq, savol qolmoqda: nega Z avlodiga hayotining har bir yangi bosqichini yangi «davr» deb atash yoqadi?
